អំពីធនាគារ

អំពីធនាគារ ស្ថាបនា

ក្រុមប្រឹក្សាភិបាល

គណៈកម្មធិការប្រតិបត្តិ

របាយការណ៍ប្រចាំឆ្នាំ

របាយករណ៍ហិរញ្ញវត្ថុ

ទំនួលខុសត្រូវសង្គមរបស់ក្រុមហ៊ុន

ពានរង្វាន់ និងការទទួលស្គាល់

គោលនយោបាយឯកជនភាព

ក្រមប្រតិបត្តិរបស់ BFI

ម្ចាស់ក្រុមហ៊ុនផ្ទាល់របស់ ធនាគារ ស្ថាបនា ភីអិលស៊ី គឺជាសាជីវកម្ម ម៉ារ៉ូហាន់ របស់ជប៉ុនដែលបានបង្កើតឡើងតាំងពីខែឧសភា ឆ្នាំ១៩៧៥ ដោយលោក បណ្ឌិត Han Chang-Woo ប្រធានក្រុមប្រឹក្សាភិបាល ហើយបច្ចុប្បន្នគឺជាក្រុមហ៊ុនពហុកំសាន្តឈានមុខគេក្នុងប្រទេសជប៉ុន។ នាពាក់កណ្ដាលទស្សវត្សឆ្នាំ២០០០ លោក បណ្ឌិត Han Chang-Woo បានធ្វើកំណើរទស្សនកិច្ច នៅតាមបណ្ដាប្រទេសមួយចំនួនក្នុងតំបន់អាស៊ីអាគ្នេយ៍ដើម្បីសិក្សាស្វែងយល់ពីសក្ដានុពល និងឱកាសអាជីវកម្មថ្មីៗក្នុងគោលបំណងបង្កើនសេដ្ឋកិច្ច និងជួយប្រជាពលរដ្ឋរបស់ប្រទេសទាំងនោះអោយមានជីវភាពប្រសើរឡើង។ លោកបណ្ឌិត Han Chang-Woo មានបទពិសោធន៍ក្នុងកំឡុងពេលដែលប្រទេសជប៉ុន ចាប់ផ្តើមមានភាពរីកចំរើនពីទស្សវត្សឆ្នាំ ១៩៥០ រហូតដល់បច្ចុប្បន្ន។ គាត់បានជួបប្រាស័្រយទាក់ទងជាមួយមន្រ្តីរដ្ឋាភិបាលជាន់ខ្ពស់ និងពាណិជ្ជករដើម្បីទទួលបាននូវយោបល់ និងការពិភាក្សាផ្សេងៗ។ លោកបណ្ឌិតបានចាប់អារម្មណ៍ជាពិសេសចំពោះប្រទេសកម្ពុជា ហើយគាត់មានអារម្មណ៍ថា ប្រទេសកម្ពុជាមានសក្ដានុពល បន្ទាប់ពីបានឆ្លងកាត់បទពិសោធន៍ដ៏លំបាកបំផុតក្នុងសម័យសង្រ្គាមស៊ីវិល។ លោក បណ្ឌិត យល់ឃើញថាការបង្កើតធនាគារពាណិជ្ជជាមួយនឹងការធ្វើបដិសណ្ឋារកិច្ចតាមបែបជប៉ុន ពិតជាអាចជួយ និងចូលរួមចំណែកក្នុងការអភិវឌ្ឍន៍ភាពរីកចំរើនរបស់ប្រទេសកម្ពុជា។

ដោយហេតុនេះ លោកបណ្ឌិត Han Chang-Woo បានបង្កើត ម៉ារ៉ូហាន់ ធនាគារជប៉ុន ភីអិលស៊ី ក្នុងខែឧសភា ឆ្នាំ២០០៨ ដែលជាធនាគារពាណិជ្ជទីមួយដែលគ្រប់គ្រងដោយជនជាតិជប៉ុន ក្នុងគោលបំណងចូលរូមអភិវឌ្ឃន៍ និងលើកស្ទួយប្រទេសកម្ពុជាតាមរយៈការផ្ដល់នូវសេវាធនាគារសម្បូបែប និងការវិនិយោគពីប្រទេសជប៉ុន។ ទស្សនៈវិស័យរបស់គាត់ គឺជួយគាំទ្រប្រជាជនកម្ពុជាដែលខិតខំចូលរួមក្នុងការអភិវឌ្ឃន៏សេដ្ឋកិច្ចប្រទេសកម្ពុជា ក្នុងស្មារតីប្រកួតប្រជែងដោយមិនផ្ដេកផ្ដួល ឬទទួលយកនូវស្ថានភាពបច្ចុប្បន្ននោះឡើយ។ ដើម្បី គាំទ្រអោយពេញលេញដល់ប្រជាជនកម្ពុជា ម៉ារ៉ូហាន់ ធនាគារជប៉ុន ជាធនាគារពាណិជ្ជទីមួយដែលផ្ដល់កម្ចីមិនមានទ្រព្យបញ្ចាំដល់គ្រឹះស្ថានមីក្រូហិរញ្ញវត្ថុ។

ឱកាសបានលេចឡើងក្នុងខែធ្នូ ឆ្នាំ២០១២ ដែលអាចអនុញ្ញាតិអោយ ម៉ារ៉ូហាន់ ធនាគារជប៉ុន ភីអិលស៊ី មានលទ្ធភាពទិញយកភាគហ៊ុនរបស់ ស្ថាបនា លីមីតធីត ដែលជាគ្រឹះស្ថានមីក្រូហិរញ្ញវត្ថុឈានមុខគេក្នុងប្រទេសកម្ពុជា។ ស្ថាបនា លីមីតធីត ត្រូវបានបង្កើតឡើងដំបូងក្នុងនាមជា អង្គការក្រៅរដ្ឋាភិបាល (NGO) ក្នុងឆ្នាំ១៩៩៥ ហើយក្នុងពេលដែល ម៉ារ៉ូហាន់ ធនាគារជប៉ុន ទិញយកភាគហ៊ុនរបស់ស្ថាបនា ដែលជាគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ដែលអាចផ្ដល់សេវាកម្ចីដល់ប្រជាជនដែលមានចំណូលទាបនៅទូទាំងប្រទេសជាមួយនឹងការចូលរួមអភិវឌ្ឃន៏ និងលើកស្ទួយសេដ្ឋកិច្ចប្រទេសកម្ពុជាតាមរយៈសាខាចំនួន ១៤០ និងការិយាល័យផ្ដល់សេវារបស់ខ្លួនជាច្រើនផ្សេងទៀតនៅទូទាំងប្រទេស។

ម៉ារ៉ូហាន់ ធនាគារជប៉ុន បានកំពុងផ្ដោតសំខាន់លើការផ្ដល់ផលិតផល និងសេវាធនាគារពាណិជ្ជ ដែលមានគោលបំណងពង្រឹកប្រតិបត្តិការរបស់ខ្លូនទូទាំងប្រទេស។ ជាមួយគ្នានេះដែរ ស្ថាបនា លីមីតធីត បានកំពុងផ្ដោតសំខាន់លើសេវា និងផលិតផលមីក្រូហិរញ្ញវត្ថុទៅប្រជាជនដែលមានចំណូលទាបនៅទូទាំងប្រទេស ដោយមានគោលបំណងក្លាយជាធនាគារពាណិជ្ជពេញលេញ។ លោកបណ្ឌិត Han Chang-Woo ប្រធានក្រុមប្រឹក្សាភិបាលបាន យល់ឃើញពីភាពស្រដៀងគ្នានៃសក្តានុពល និងគោលដៅរួមរបស់ម៉ារ៉ូហាន់ ធនាគារជប៉ុន និងស្ថាបនា លីមីតធីត ដែលអាចបំពេញអោយគ្នាទៅវិញទៅមកបាន ក៏លោកបានសម្រេចចិត្តធ្វើការរួមបញ្ចូលគ្នារវាងស្ថាប័នទាំងពីរដើម្បីកំលាយខ្លួនជា ធនាគារពាណិជ្ជថ្មីមួយ។

អាស្រ័យដោយការរួមបញ្ជូលគ្នារវាងគ្រឹះស្ថានហិរញ្ញវត្ថុក្នុងប្រទេសកម្ពុជា ពុំធ្លាប់មានប្រវត្តិពីមុនមក និងឆ្លងកាត់ការពិគ្រោះយោលបល់ជាច្រើនជាមួយ ធនាគារជាតិ នៃកម្ពុជា និងស្ថាប័នរបស់រដ្ឋាភិបាលដែលពាក់ព័ន្ធ ធនាគារ ស្ថាបនា ភីអិលស៊ី ត្រូវបានបង្កើតឡើងដោយជោគជ័យក្នុងខែ មេសា ឆ្នាំ២០១៦ ជាមួយនឹងដើមទុនចុះបញ្ជី ១២០ លានដុល្លារសហរដ្ឋអាមេរិក មានសាខាចំនួន ១៦០ មានម៉ាស៊ីន អេធីអឹម ៧៣ និងបុគ្គលិកចំនួន ៣៤៥៨ នាក់។ ធនាគារពាណិជ្ជដែលបានរួមបញ្ចូលគ្នាថ្មី បានបង្កើតឡើងដើម្បីផ្តល់សេវាកម្មធនាគារប្រកបដោយភាពជឿជាក់ ក្នុងនាមជាធនាគាររបស់ប្រជាជនក្នុងព្រះរាជាណាចក្រកម្ពុជា និងបំពាក់សក្ដានុពលដល់សហគ្រិន ព្រមទាំងបង្កើតឲ្យមានឱកាសការងារដើម្បីបង្កើតអាជីវកម្ម និងលើកកំពស់ជីវភាពរស់នៅរបស់ពួកគេតាមរយៈការទទួលយកបាននូវសេវាកម្មហិរញ្ញវត្ថុដែលមានស្ថេរភាព។

ទិសដៅរបស់លោកបណ្ឌិត Han Chang-Woo ប្រធានក្រុមប្រឹក្សាភិបាល មានភាពច្បាស់លាស់គឺ “យើងនឹងបន្ដលើកតម្កើនកម្រិតនៃការពេញចិត្តរបស់អតិថិជន និងពង្រីកអាជីវកម្មរបស់ពួកយើងជាមួយនឹងគំនិតឆ្នៃប្រឌិត និងស្មារតីជាអ្នកដឹកនាំ។ យើងមានគោលបំណងក្លាយជាធនាគារពាណិជ្ជឈានមុនគេក្នុងប្រទេសកម្ពុជា”។

ចក្ខុវិស័យ

ជាធនាគារដែលឈានមុខគេ និងគួរឱ្យទុកចិត្តបំផុតក្នុងការផ្តល់សេវាកម្មធនាគារពេញលេញនៅទូទាំងព្រះរាជាណាចក្រកម្ពុជា។

បេសកកម្ម

ជួយលើកកម្ពស់អាជីវកម្ម និងជីវភាពរស់នៅរបស់ប្រជាជនតាមរយៈការផ្តល់សេវាកម្មធនាគារពេញលេញដោយប្រើ បច្ចេកវិទ្យាទំនើបនៅទូទាំងប្រទេស និងរួមចំណែកដល់ការអភិវឌ្ឍប្រទេសកម្ពុជាប្រកបដោយចីរភាព។

បណ្ឌិត HAN CHANG-WOO

ប្រធានក្រុមប្រឹក្សាភិបាល

លោកបណ្ឌិត HAN CHANG-WOO ជាស្ថាបនិក និងជាប្រធានក្រុមហ៊ុន MARUHAN Corporation ក្នុងប្រទេសជប៉ុនដែលកំពុងធ្វើការផ្គត់ផ្គង់ និងរៀបចំសម្ភារកម្សាន្តជាច្រើនប្រភេទដូចជា៖ ទីលានវាយកូនហ្គោល ទីលានហាត់វាយកូនហ្គោល កន្លែងបោះបូលីង មជ្ឈមណ្ឌលហ្គេម ភោជនីយដ្ឋាន និង Pachinko Parlors (Pinball របស់ជប៉ុន)។ លោកបណ្ឌិត បានបង្កើតក្រុមហ៊ុន MARUHAN Corporation ក្នុងឆ្នាំ ១៩៥៧ និងបានធ្វើឱ្យអាជីវកម្មមួយនេះមានការវិវឌ្ឍយ៉ាងលឿនដែលបានទទួលចំណូលក្នុងការលក់សរុបជាង ២៥ ពាន់លានដុល្លារក្នុងមួយឆ្នាំ។ ក្រុមហ៊ុន MARUHAN Corporation ត្រូវបានស្គាល់ថាជាក្រុមហ៊ុនឈានមុខគេក្នុងវិស័យឧស្សាហកម្មក្នុងប្រទេសជប៉ុន។ ភាពជោគជ័យនៃការរីកចម្រើនផ្នែកអាជីវកម្មរបស់ក្រុមហ៊ុន គឺកើតចេញពីការប្តេជ្ញាចិត្តក្នុងការប្រកួតប្រជែងខ្ពស់របស់លោកបណ្ឌិត HAN និងជំនឿចិត្តដ៏រឹងមាំក្នុងការបំពេញតាមតម្រូវចិត្តរបស់អតិថិជន។ បច្ចុប្បន្ន លោកបណ្ឌិត កំពុងចូលរួមយ៉ាងសកម្មជាមួយសមាគមមួយចំនួនក្នុងនាមជាទីប្រឹក្សាកិត្តិយសនៃមូលនិធិវប្បធម៌ Han Chang-Woo Tetsu ប្រធានសមាគម Kyoto UNESCO Association ប្រធានសមាគម United Nations Association of Japan Kyoto Headquarters ប្រធាន Tokyo Philharmonic ប្រធានក្រុមប្រឹក្សាភិបាល World Federation of Korean Chambers of Commerce and Industry និងទីប្រឹក្សាកិត្តិយសនៃ Central Association of Japan-Korea Friendship Societies ។ ចាប់តាំងពីខែមិថុនា ឆ្នាំ ២០២៣ លោកជាអភិបាលតំណាង និងជាប្រធានក្រុមប្រឹក្សាភិបាលនៃក្រុមហ៊ុន Taiheiyo Club, Inc. ដែលជា បុត្រសម្ព័ន្ធរបស់ក្រុមហ៊ុន MARUHAN Corporation ទទួលបន្ទុកលើការគ្រប់គ្រងទីលានវាយកូនហ្គោលចំនួន ១៨ នៅប្រទេសជប៉ុន និងជាទីកន្លែងសម្រាប់ប្រារព្ធការប្រកួតជើងឯកវាយកូនហ្គោលលំដាប់ពិភពលោកជាប្រចាំ។ លោកបានទទួលសញ្ញាបត្រថ្នាក់បរិញ្ញាបត្រផ្នែកសេដ្ឋកិច្ចនយោបាយពីសាកលវិទ្យាល័យ Hosei នៅឆ្នាំ ១៩៥៣។

លោក HAN KEN

អនុប្រធានក្រុមប្រឹក្សាភិបាល

លោក HAN KEN បានបម្រើការជាមួយក្រុមហ៊ុន MARUHAN Corporation ក្នុងឆ្នាំ ២០០០ បន្ទាប់ពីលោកបានធ្វើការនៅក្រុមហ៊ុនមូលធនប័ត្រ Nomura តាំងពីឆ្នាំ ១៩៩៨។ នៅឆ្នាំ ២០០៧ លោកត្រូវបានចាត់តាំងជាអភិបាលនៃក្រុមហ៊ុន MARUHAN Corporation ហើយនៅឆ្នាំ ២០១៤ ជាអភិបាលប្រតិបត្តិ។ នៅឆ្នាំ ២០២០ លោកត្រូវបានចាត់តាំងជាតំណាងអភិបាលប្រចាំតំបន់។ នៅឆ្នាំ ២០២១ លោកត្រូវបានចាត់តាំងជាប្រធានក្រុមហ៊ុនហិរញ្ញវត្ថុនៃក្រុមហ៊ុន MARUHAN Corporation។ លោកក៏មានតួនាទីជាអភិបាលផ្នែកគ្រប់គ្រង និងជាប្រធាននាយកប្រតិបត្តិរបស់ក្រុមហ៊ុន MARUHAN Investment Asia Pte. Ltd ដែលមានស្នាក់ការកណ្តាលស្ថិតនៅក្នុងប្រទេសសិង្ហបុរី។ លោកគ្រប់គ្រងក្រុមហ៊ុនបុត្រសម្ព័ន្ធហិរញ្ញវត្ថុដូចជា ធនាគារ ស្ថាបនា ភីអិលស៊ី គ្រឹះស្ថានមីក្រូហិរញ្ញវត្ថុ ស្ថាបនា លីមីតធីត នៅប្រទេសមីយ៉ាន់ម៉ា និងម៉ារ៉ូហាន់ ធនាគារ ជប៉ុន នៅប្រទេសឡាវ។ នៅខែមិថុនា ឆ្នាំ ២០២៣ លោកត្រូវបានតែងតាំងជាអភិបាល នៃក្រុមហ៊ុន Taiheiyo Club, Inc. ដែលជា បុត្រសម្ព័ន្ធរបស់ក្រុមហ៊ុន MARUHAN Corporation ទទួលបន្ទុកលើការគ្រប់គ្រងទីលានវាយកូនហ្គោលចំនួន ១៨ នៅប្រទេសជប៉ុន និងជាទីកន្លែងសម្រាប់ប្រារព្ធការប្រកួតជើងឯកវាយកូនហ្គោលលំដាប់ពិភពលោកជាប្រចាំ។ លោកក៏បានបញ្ចប់ការសិក្សាថ្នាក់បរិញ្ញាបត្រផ្នែកច្បាប់ ពីសាកលវិទ្យាល័យ DOSHISHA នៅឆ្នាំ ១៩៩៧។

លោក Takehito HOSOI

អភិបាល

លោក Takehito HOSOI មានបទពិសោធន៍ជាង ៣៥ ឆ្នាំ នៅក្នុងវិស័យហិរញ្ញវត្ថុ ជាពិសេសលោកបានចំណាយពេលជាង ១០ ឆ្នាំ បម្រើការនៅធនាគារ The Nippon Credit (ក្រោយមកប្តូរឈ្មោះទៅជា ធនាគារ Aozora) និង រយៈពេល២៥ ឆ្នាំនៅក្រុមហ៊ុន Daiwa Securities ។
ក្រៅពីបទពិសោធន៍នៅលើផ្នែកធនាគារសាជីវកម្មទាំងនៅលើទីផ្សារក្នុងប្រទេស និងក្រៅប្រទេស លោក Hosoi មានជំនាញក្នុងការទំនាក់ទំនងជាមួយស្ថាប័នហិរញ្ញវត្ថុផ្សេងៗ ក្នុងអំឡុងពេលដែលលោកបម្រើការនៅធនាគារវិនិយោគ។ តាមរយៈការយល់ដឹងយ៉ាងជ្រៅជ្រះរបស់លោកអំពីវិស័យហិរញ្ញវត្ថុផ្សេងៗ និងទំនាក់ទំនងយ៉ាងរឹងមាំជាមួយស្ថាប័នហិរញ្ញវត្ថុជាច្រើន លោកបានផ្តល់សេវាប្រឹក្សាយោបល់ជូនអតិថិជនរបស់លោកអំពីយុទ្ធសាស្ត្រហិរញ្ញវត្ថុ ការគ្រប់គ្រងដើមទុន និងការអភិវឌ្ឍន៍អាជីវកម្ម។ ដូចគ្នានេះផងដែរ លោក Hosoi បានជួយអតិថិជនរបស់លោកឱ្យប្រើប្រាស់ឧបករណ៍ទីផ្សារមូលធន អនុវត្តជម្រើសយុទ្ធសាស្រ្តវិនិយោគសម្រាប់កំណើនអាជីវកម្ម និងកសាងទំនាក់ទំនងយ៉ាងរលូនជាមួយ វិនិយោគិនស្ថាប័ន។ លើសពីនេះ លោក Hosoi បានចំណាយពេល ៥ ឆ្នាំនៅក្រុមហ៊ុនមូលធនឯកជន និង venture capital vehicles របស់ក្រុមហ៊ុន Daiwa Securities ហើយលោកបានដើរតួនាទីយ៉ាងសំខាន់ក្នុងការសម្រេចចិត្តវិនិយោគក្នុងនាមជាប្រធាននាយកប្រតិបត្តិ។
នៅខែមករា ឆ្នាំ ២០២៤ លោកបានចូលរួមជាមួយក្រុមហ៊ុន MARUHAN Corporation ដែលជាម្ចាស់ភាគហ៊ុនរបស់ធនាគារ ស្ថាបនាភី អិលស៊ី ហើយបច្ចុប្បន្នលោកមានតួនាទីជាមន្ត្រីសាជីវកម្មនៃក្រុមហ៊ុនហិរញ្ញវត្ថុ និងជាអ្នកគ្រប់គ្រងទូទៅនៃនាយកដ្ឋានផែនការសាជីវកម្ម។
លោក Hosoi បានទទួលសញ្ញាបត្របរិញ្ញាបត្រផ្នែកសេដ្ឋកិច្ចពីសាកលវិទ្យាល័យ Keio ក្នុងឆ្នាំ ១៩៨៧។

លោក Naoya Hiramatsu

អភិបាល

លោក Naoya Hiramatsu បានចាប់ផ្តើមអាជីពការងារនៅធនាគារ Mitsubishi UFJ ក្នុងទីក្រុងតូក្យូក្នុងឆ្នាំ ១៩៨៨។ ក្នុងរយៈពេល ៣៥ ឆ្នាំ លោកមានបទពិសោធន៍ការងារយ៉ាងច្រើនក្នុងនាមជានាយកប្រតិបត្តិនៅក្នុងវិស័យធនាគារ និងផ្នែកសាជីវកម្ម។
អាជីពការងាររបស់លោកនៅ MUFG រាប់បញ្ចូលទាំងបទពិសោធន៍ការងារក្រៅប្រទេសអស់រយៈពេល ១៦ ឆ្នាំនៅទីក្រុងញូវយ៉ក និងប្រទេសសិង្ហបុរី ដែលលោកបានកាន់មុខតំណែងផ្នែករតនាគារ ផ្នែកផែនការសាជីវកម្ម ផ្នែកហិរញ្ញវត្ថុ ផ្នែកធនធានមនុស្ស ផ្នែកគ្រប់គ្រងព័ត៌មានវិទ្យា និងផ្នែកគ្រប់គ្រងហានិភ័យ និងប្រតិបត្តិតាម។ លើសពីនេះ លោកបានបង្កើតយុទ្ធសាស្រ្ត ដើម្បីឱ្យបុគ្គលិកក្នុងស្រុកចូលរួម ក្នុងដំណើរការគ្រប់គ្រង អនុវត្តកំណែទម្រង់អភិបាលកិច្ចសំខាន់ៗ និងធ្វើឱ្យវត្តមានធនាគារលើឆាកអន្តរជាតិកាន់តែលេចធ្លោ និងបង្កើនប្រសិទ្ធភាពប្រតិបត្តិការរបស់ធនាគារ ដែលជាផ្នែកដ៏សំខាន់ក្នុងការរួមចំណែកដល់ការពង្រីកប្រតិបត្តិការ។
នៅឆ្នាំ ២០១៩ លោក Hiramatsu បានផ្លាស់ទៅបម្រើការងារនៅ Nippon Paint Group ដែលលោកបាន ដឹកនាំកិច្ចខិតខំប្រឹងប្រែងរបស់គ្រុបឱ្យទៅកាន់សកលភាវូបនីយកម្ម។ ក្នុងនាមជាអនុប្រធាន និងជានាយកប្រតិបត្តិសាជីវកម្មនៅ Nippon Paint Automotive Coatings Co., Ltd. លោកបានដឹកនាំកំណែទម្រង់ហិរញ្ញវត្ថុ និងរចនាសម្ព័ន្ធ បង្កើតតំបន់អាជីវកម្មថ្មីៗ និងពង្រឹងមូលដ្ឋានគ្រឹះនៃការគ្រប់គ្រង។ លើសពីនេះ តាមរយៈការប្រើប្រាស់បញ្ញាសិប្បនិមិត្ត និងការផ្លាស់ប្តូរឌីជីថលក្នុងប្រតិបត្តិការអាជីវកម្ម លោក Hiramatsu បានបង្កើនផលិតភាព បង្វែរក្រុមហ៊ុនឱ្យទទួលបានប្រាក់ចំណេញ និងសម្រេចបាននូវកំណើនយ៉ាងច្រើនសន្ធឹកសន្ធាប់ ។
នៅឆ្នាំ ២០២៤ លោក Hiramatsu បានចូលរួមជាមួយក្រុមហ៊ុន MARUHAN Corporation ជាមន្រ្តីសាជីវកម្ម ដែលទទួលខុសត្រូវក្នុងការត្រួតពិនិត្យស្ថាប័នហិរញ្ញវត្ថុសាខានៅក្រៅប្រទេស និងផ្តល់ការគាំទ្រសម្រាប់ការផ្តួចផ្តើមយុទ្ធសាស្រ្តក្នុងការអភិវឌ្ឍន៍អាជីវកម្ម និងកំណែទម្រង់ស្ថាប័ន។

លោក YOSHIKI KAWAHARA

អភិបាល

លោក Yoshiki Kawahara មានបទពិសោធន៍ក្នុងវិស័យធនាគារជាង 30 ឆ្នាំ ពោលគឺ លោកបានចាប់ផ្តើមអាជីពក្នុងឆ្នាំ 1990 នៅ Sumitomo Mitsui Banking Corporation (SMBC) ក្នុងប្រទេសជប៉ុន។ លោកមានបទពិសោធន៍ដឹកនាំ និងមានតួនាទីជាច្រើនរួមមាននាយក នាយកដ្ឋានកិច្ចការសាធារណៈតូក្យូ ប្រធានផ្នែកនៃនាយកដ្ឋានសេវាកម្ម និងប្រធានសាខា។ លោក ត្រូវបានទទួលស្គាល់ក្នុងការបំពេញតួនាទី និងដឹកនាំបានយ៉ាងល្អលើផ្នែកប្រតិបត្តិតាម ការគ្រប់គ្រងហានិភ័យ និងសវនកម្មផ្ទៃក្នុង។
លោកបានចូលបម្រើការងារនៅ Maruhan Corporation ដែលជាម្ចាស់ភាគហ៊ុនរបស់ ធនាគារ ស្ថាបនា ភីអិលស៊ី នាខែវិច្ឆិកា ឆ្នាំ 2023 ហើយបច្ចុប្បន្នលោក បាន និងកំពុងបម្រើការក្នុងតំណែងជាអគ្គនាយកសវនកម្ម នៃក្រុមហ៊ុនហិរញ្ញវត្ថុ នៃ Maruhan Corporation ។ លោក Kawahara បានបញ្ចប់បរិញ្ញាបត្រផ្នែកច្បាប់ពីសាកលវិទ្យាល័យតូក្យូ (ប្រទេសជប៉ុន) ក្នុងឆ្នាំ 1990 និងទទួលបានសញ្ញាបត្រជំនាញសវនករផ្ទៃក្នុង (CIA) ក្នុងឆ្នាំ 2023 ។

ឯកឧត្តម គិម វ៉ាដា

អភិបាលឯករាជ្យ

ឯកឧត្តម គិម វ៉ាដា មានបទពិសោធន៍ការងាររយៈពេលជាង ៣៧ ឆ្នាំ នៅធនាគារជាតិ នៃកម្ពុជាដោយចាប់ផ្តើមពីតំណែងជាប្រធានការិយាល័យ នៅសាខាខេត្តកណ្ដាលរបស់ធនាគារជាតិ នៃកម្ពុជា រហូតក្លាយជាអគ្គនាយក នៃអគ្គនាយកដ្ឋានត្រួតពិនិត្យនៃធនាគារជាតិ នៃកម្ពុជា។ ក្នុងអំឡុងពេលបំពេញការងារនៅធនាគារជាតិ ឯកឧត្តមបានទទួលបន្ទុក និងមានតួនាទីជាថ្នាក់ដឹកនាំជាន់ខ្ពស់ជាច្រើនជាមួយនឹងបទពិសោធន៍ទូលំទូលាយក្នុងវិស័យធនាគារ ដោយរួមបញ្ចូលទាំងផ្នែកគ្រប់គ្រងហានិភ័យ (ហានិភ័យទីផ្សារ ហានិភ័យឥណទាន ហានិភ័យសន្ទនីយភាព និងហានិភ័យប្រតិបត្តិការជាដើម) អភិបាលកិច្ច និងយុទ្ធសាស្រ្ត អាជីវកម្ម។ ឯកឧត្តមបានដើរតួនាទីយ៉ាងសំខាន់ក្នុងការរៀបចំប្រព័ន្ធធនាគារនៅកម្ពុជាឡើងវិញយ៉ាងជោគជ័យក្នុងអំឡុងទសវត្សឆ្នាំ២០០០ក្នុងការបង្កើតឱ្យមានប្រព័ន្ធធនាគារមួយដែលមានលក្ខណៈប្រកួតប្រជែង និងប្រកបដោយសុវត្ថិភាពក្រោមការត្រួតពិនិត្យ និងគ្រប់គ្រងបានយ៉ាងល្អ ព្រមទាំងបានបង្កើតឱ្យមានការកេណ្ឌប្រមូលប្រាក់បញ្ញើយ៉ាងមានប្រសិទ្ធភាពសម្រាប់ផ្តល់ហិរញ្ញប្បទាន ដើម្បីជម្រុញកំណើនសេដ្ឋកិច្ចកម្ពុជា។ ឯកឧត្តម គិម វ៉ាដា ទទួលបានបរិញ្ញាបត្រផ្នែកច្បាប់ក្នុងឆ្នាំ ១៩៧៥ បរិញ្ញាបត្រផ្នែកធនាគារ ក្នុងឆ្នាំ ១៩៨៥ និងអនុបណ្ឌិតផ្នែកគ្រប់គ្រងធុរកិច្ច ជំនាញហិរញ្ញវត្ថុ ពីសាកលវិទ្យាល័យ Charles Sturt ប្រទេសអូស្ត្រាលី នៅឆ្នាំ ២០០៣។ ឯកឧត្តមធ្លាប់ធ្វើជាសាស្ត្រាចារ្យ និងជាវាគ្មិននៅសាកលវិទ្យាល័យល្បីៗមួយចំនួននៅក្នុងប្រទេសកម្ពុជា។ លើសពីនេះ ក្នុងអំឡុងពេល ១០ ឆ្នាំចុងក្រោយនេះលោកបានចូលរួមយ៉ាងសកម្មក្នុងនាមជាវាគ្មិនក្នុងសន្និសីទសិក្ខាសាលាជាតិ និងអន្តរជាតិជាច្រើនដែលទាក់ទងនឹងក្របខណ្ឌបទប្បញ្ញត្តិច្បាប់ ការត្រួតពិនិត្យគ្រឹះស្ថានធនាគារ និងមីក្រូហិរញ្ញវត្ថុ ព្រមទាំងសេវាកម្មធនាគារចល័ត និងបរិយាប័ន្នហិរញ្ញវត្ថុ។ ចំពោះការងារអន្តរជាតិលោកបានទទួលបន្ទុកជាប្រធានក្រុមប្រឹក្សាភិបាលនៃសមាគមឥណទានកសិកម្ម និងជនបទប្រចាំតំបន់អាស៊ីប៉ាស៊ីហ្វិក (APRACA) ពីខែកក្កដា ឆ្នាំ ២០១២ ដល់ខែមិថុនា ឆ្នាំ ២០១៤ និងជាសមាជិកប្រតិបត្តិ នៃសហព័ន្ធបរិយាប័ន្នហិរញ្ញវត្ថុ (AFI) ពីខែមករា ឆ្នាំ ២០១៥ ដល់ខែមិថុនា ឆ្នាំ ២០១៧ ផងដែរ។

ឯកឧត្តម SHINOHARA KATSUHIRO

អភិបាលឯករាជ្យ

ឯកឧត្តម SHINOHARA KATSUHIRO ធ្លាប់មានប្រវត្តិរស់នៅប្រទេសកម្ពុជាជាង ៥០ ឆ្នាំកន្លងមកហើយ។ នៅឆ្នាំ១៩៦៧ គាត់បានមកដល់ប្រទេសកម្ពុជាលើកដំបូងក្នុងនាមជាមន្ត្រីការទូតរបស់ជប៉ុន និងបានចំណាយពេល២ឆ្នាំដំបូងរស់នៅក្នុងវត្តឧណ្ណាលោមក្នុងរាជធានីភ្នំពេញដែលក្នុងនោះលោកបានចំណាយពេល៧ខែបួសជាព្រះសង្ឃដើម្បីសិក្សាភាសា និងវប្បធម៌ខ្មែរមុនពេលចូលកាន់មុខដំណែងជាមន្ត្រីលេខានៅស្ថានទូតជប៉ុនក្នុងប្រទេសកម្ពុជា។ បន្ទាប់ពីឯកឧត្តមបានវិលត្រឡប់មកកាន់ប្រទេសកម្ពុជាក្នុងនាមជាអគ្គទីប្រឹក្សាស្ថានទូតជប៉ុន (ពីឆ្នាំ ១៩៩១ ដល់ ១៩៩៤ និងពីឆ្នាំ២០០១ ដល់ ២០០៤) ឯកឧត្តមបានបង្កើតចំណងមិត្តភាពជាមួយប្រទេសកម្ពុជាយ៉ាងរឹងមាំក្នុងតួនាទីជាឯកអគ្គរាជទូតជប៉ុនប្រចាំប្រទេសកម្ពុជាចាប់ពីឆ្នាំ ២០០៧ រហូតដល់ឆ្នាំ ២០០៩។ ចាប់ពីខែធ្នូឆ្នាំ២០១២មក ឯកឧត្តម គឺជាអភិបាលឯករាជ្យរបស់ ធនាគារ ស្ថាបនា ហើយលោកក៏ជាសមាជិកគណៈកម្មការកម្រិតក្រុមប្រឹក្សាភិបាល។ បច្ចុប្បន្នលោកជាប្រធានតំណាងនៃអង្គការ NGO មូលនិធិគាំទ្រការអប់រំអន្តរជាតិកម្ពុជា(CIESF) នៃប្រទេសជប៉ុនដែលមាន មានទីតាំងនៅរាជធានីភ្នំពេញ។

លោក John Gerard Williams

អភិបាលឯករាជ្យ

ជាមួយនឹងប្រវត្តិការងារថ្នាក់អន្តរជាតិ និងបទពិសោធន៍ជានាយកប្រតិបត្តិជាន់ខ្ពស់ផ្នែកធនធានមនុស្សយ៉ាងទូលំទូលាយ លោក Willams បានចាប់ផ្តើមអាជីពការងារនៅក្នុងឧស្សាហកម្មសេវាហិរញ្ញវត្ថុ ក្នុងឆ្នាំ ១៩៨៦។ ក្នុងអាជីពការងារមួយដែលមានរយៈពេល ៣៦ឆ្នាំ លោក Williams មានតួនាទីជាថ្នាក់ដឹកនាំជាន់ខ្ពស់ផ្នែកធនធានមនុស្សទាំងក្នុងស្រុក និងក្រៅស្រុក។ លោក Williams មានបទពិសោធន៍យ៉ាងច្រើនក្នុងការបំពេញការងារជាមួយនាយកប្រតិបត្តិជាន់ខ្ពស់ និងក្រុមប្រឹក្សាភិបាលដែលប្រកបដោយវិជ្ជាជីវៈ។
ក្រៅពីនៅទីក្រុងឡុងដ៍ លោក Williams បានចំណាយពេលលើអាជីពការងាររបស់លោកនៅទីក្រុងជាច្រើនដូចជា អាំស្ទែដាំ តូក្យូ ហុងកុង និងសិង្ហបុរី។ លោកក៏បានបំរើការនៅក្នុងក្រុមហ៊ុនពហុជាតិធំតូចជាច្រើន ហើយលោកបានរៀនសូត្រ និងសម្របខ្លួនតាមបរិយាបទការងារនីមួយៗបានយ៉ាងល្អ។
លោក Williams មានសមត្ថភាពខ្ពស់ក្នុងការកសាង អភិវឌ្ឍ និងដឹកនាំក្រុមកការងារធនធានមនុស្សក្នុងការជ្រើសរើសថ្នាក់ដឹកនាំជាន់ខ្ពស់ និងប្រាកដថាពួកគេអាចសម្របខ្លួន និងបំពេញការងារប្រកបដោយប្រសិទ្ធភាពខ្ពស់។ លោកយល់ច្បាស់អំពីភាពខុសគ្នានៃវប្បធម៌ និងភាពចម្រុះនៃជាតិសាសន៍។ លោកធ្លាប់បានដឹកនាំគម្រោងអន្តរជាតិសំខាន់ៗក្នុងផ្នែកជាច្រើនដូចជា សំណង និងអត្ថប្រយោជន៍បុគ្គលិក ការជ្រើសរើសបុគ្គលិក ការផ្លាស់ប្តូររចនាសម្ព័ន្ធក្រុមហ៊ុន ការគ្រប់គ្រងបុគ្គលិក និងបុគ្គលិកជំនាញៗមកពីបរទេស។ ក្នុងបទពិសោធន៍ការងារ លោកបានធ្វើការជាមួយក្រុមហ៊ុន Swiss Re ធនាគារ Kleinwort Benson ធនាគារ ING ក្រុមហ៊ុន Daiwa Capital Markets និង ធនាគារ MUFG ។
នៅចុងឆ្នាំ ២០២២ លោក Williams បានសម្រេចចិត្តលាឈប់ពីការងារសាជីវកម្មរបស់លោក ហើយនៅក្នុងឆ្នាំ ២០២៣ លោកបានបង្កើតអាជីវកម្មផ្ទាល់ខ្លួនដោយផ្តោតសំខាន់ទៅលើ ការបង្ហាត់បង្រៀន ការសម្របសម្រួល និងការងារប្រឹក្សាផ្នែកធនធានមនុស្ស។
លោកគឺជាគ្រូបង្វឹកជំនាញដ៏មានគុណសម្បត្តិមួយរូប នៅសហព័ន្ធគ្រូបង្វឹកអន្តរជាតិ និងមានការផ្តល់កិត្តិយសជាអ្នកសម្របសម្រួលដោយមជ្ឍមណ្ឌលដោះស្រាយវិវាទប្រកបដោយប្រសិទ្ធភាព (CEDR)។
ក្នុងឆ្នាំ ២០២៤ លោក Williams បានចូលរួមជាមួយធនាគារ ស្ថាបនា ភីអិលស៊ី ក្នុងនាមជាអភិបាលឯករាជ្យ និងជាប្រធានគណៈកម្មការតែងតាំង និងផ្តល់តម្លៃការ។

ប្រធាននាយកប្រតិបត្តិ

លោក ហែន ហ្គី. ម៉ូលដឺ

ប្រធាននាយកប្រតិបត្តិ

បច្ចុប្បន្ននេះ លោក ហែន ហ្គី. ម៉ូលដឺ គឺជាប្រធាននាយកប្រតិបត្តិ នៃ ធនាគារ ស្ថាបនា ភីអិលស៊ី។ លោក ហែន គឺជាថ្នាក់ដឹកនាំដែលទទួលបានសមិទ្ធផលជាច្រើនជាមួយនឹងបទពិសោធន៍ការងារអស់រយៈពេលជាង ៤០ ឆ្នាំក្នុងសេវាហិរញ្ញវត្ថុបុគ្គល និងធនាគារវិនិយោគ ហើយលោក ហែន មានជំនាញ និងបទពិសោធយ៉ាងទូលំទូលាយលើការគ្រប់គ្រងយុទ្ធសាស្រ្ត និងការផ្លាស់ប្តូរ ហានិភ័យឥណទាន និងរតនាគារ។ លោក ហែន មានកំណត់ត្រា ដែលបានបង្ហាញឱ្យឃើញពីជោគជ័យនៃការផ្លាស់ប្តូរ និងការពង្រីកអាជីវកម្មក្នុងរយៈពេលដ៏ខ្លី ពោលគឺការដឹកនាំអាជីវកម្មដែលមានទ្រព្យសកម្មរាប់ពាន់លានដុល្លារអាមេរិកនៅក្នុងទីផ្សារផ្សេងៗគ្នាជាច្រើន។
លោក ហែន បានចាប់ផ្តើមអាជីពការងារនៅក្នុងឆ្នាំ ១៩៨២ នៅធនាគារ ABN Amro ដែលលោកបានបម្រើការងារ និងកាន់តួនាទីជាច្រើននៅក្នុងប្រទេសហូឡង់ ឥណ្ឌា ប្រេស៊ីល ឥណ្ឌូនេស៊ី កូឡុំប៊ី រូម៉ានី និងអារ៉ាប៊ីសាអូឌីត។
មុនពេលលោក ហែន ចូលបម្រើការងារនៅ ធនាគារ ស្ថាបនា លោកបានកាន់តំណែងជាប្រធានក្រុមប្រឹក្សាភិបាលនៃ Devshack International (“DSI Group”) ជាកន្លែងដែលលោកបានបង្កើត និងអនុវត្តយុទ្ធសាស្រ្តសម្រាប់ទីផ្សារនៅក្នុងតំបន់ Sub-Saharan។ លោក ក៏បានកាន់តួនាទីជាប្រធាននាយកប្រតិបត្តិរបស់ធនាគារជាតិពាណិជ្ជហ្សំប៊ី (“Zanaco”) នៅប្រទេសហ្សំប៊ី ជាប្រធាននាយកប្រតិបត្តិរបស់ក្រុមហ៊ុន Rabo Development នៅប្រទេសហូឡង់ និងជាប្រធាននាយកប្រតិបត្តិនៅធនាគារ PT RaboBank នៅប្រទេសឥណ្ឌូនេស៊ី ហើយលោកមានបទពិសោធការងារជាច្រើនក្នុងការធ្វើការងារក្នុងទ្វីបចំនួន ៤ ដូចជា អាស៊ី អឺរ៉ុប អាមេរិកខាងត្បូង និងអាហ្រ្វិក។

អនុប្រធាននាយកប្រតិបត្តិ

លោក អាលវីដ ស្វាកសិនប័ក

អនុប្រធាននាយកប្រតិបត្តិ

លោក អាលវីដ ស្វាកសិនប័ក ជាអនុប្រធាននាយកប្រតិបត្តិ នៃធនាគារ ស្ថាបនា ភីអិលស៊ី ដែលមានបទពិសោធន៍ជាង ២៥ ឆ្នាំក្នុងសេវាធនាគារអន្តរជាតិ និងការប្រឹក្សាលើផ្នែកគ្រប់គ្រង ដែលលាតសន្ធឹងលើទីផ្សារអភិវឌ្ឍន៍ និងកំពុងអភិវឌ្ឍន៍។ លោកមាន ជំនាញយ៉ាងច្បាស់ទៅលើសេវាធនាគាររូបវន្តបុគ្គល និងសេវាធនាគារអាជីវកម្ម ការគ្រប់គ្រងទ្រព្យសម្បត្តិ និងគំនិតផ្តួចផ្តើមលើការផ្លាស់ប្តូរយុទ្ធសាស្រ្ត រួមទាំងការអភិវឌ្ឍផ្នែកឌីជីថល ការវិភាគទិន្នន័យ និងការគ្រប់គ្រងហានិភ័យ។
ជាមួយនឹងចំណង់ចំណូលចិត្តចំពោះការច្នៃប្រឌិត និងការអភិវឌ្ឍផ្នែកឌីជីថល លោក អាលវីដ នឹងមកគ្រប់គ្រង និងដឹកនាំផ្នែកសេវាធនាគាររូបវន្តបុគ្គល សេវាធនាគារឌីជីថល និងសេវាធនាគារអាជីវកម្ម នៅធនាគារ ស្ថាបនា ដើម្បីជំរុញកំណើនប្រកបដោយនិរន្តរភាព និងភាពជោគជ័យផ្នែកពាណិជ្ជកម្ម។
បទពិសោធន៍យ៉ាងច្រើនកន្លងមករបស់ លោក អាលវីដ រួមមាន ការដឹកនាំយុទ្ធសាស្ត្រឌីជីថល និងការអភិវឌ្ឍនៅធនាគារ United Overseas (UOB) និងបម្រើការងារជាទីប្រឹក្សាផ្នែកគ្រប់គ្រងនៅក្រុមហ៊ុន Arete Financial Partners ក្នុងប្រទេសសិង្ហបុរី។ តាមរយៈអាជីពការងាររបស់លោក លោកមានតួនាទី និងតំណែងជាថ្នាក់គ្រប់គ្រងជាន់ខ្ពស់នៅធនាគារ Citibank ប្រចាំសហរដ្ឋអាមេរិក អឺរ៉ុប និងអាស៊ី។
លោក អាលវីដ បានបញ្ចប់បរិញ្ញាបត្រជាន់ខ្ពស់ផ្នែកគ្រប់គ្រងពាណិជ្ជកម្មពី Melbourne Business School និងបរិញ្ញាបត្រគ្រប់គ្រងពាណិជ្ជកម្មផ្នែកហិរញ្ញវត្ថុ និងបរិញ្ញាបត្រវិទ្យាសាស្ត្រសេដ្ឋកិច្ចពីមហាវិទ្យាល័យ William & Mary។

លោក ដេវីដ រីឆាត ថូម៉ាស

អនុប្រធាននាយកប្រតិបត្តិ

លោក ថូម៉ាស គឺជាអនុប្រធាននាយកប្រតិបត្តិនៃធនាគារ ស្ថាបនា ហើយលោកមានតួនាទីដឹកនាំផ្នែកគ្រប់គ្រងឥណទាន ផ្នែកគ្រប់គ្រងហានិភ័យ និងផ្នែកសន្តិសុខព័ត៌មាន។ លោក ថូម៉ាស មានបទពិសោធន៍ការងារជាង 30 ឆ្នាំនៅអាស៊ីប៉ាស៊ីហ្វិក។ មុនពេលចូលបម្រើការងារនៅធនាគារ ស្ថាបនា លោកជានាយកប្រតិបត្តិហានិភ័យនៅ China Development Financial Group (តៃវ៉ាន់)។ បន្ថែមពីលើនេះ លោកក៏ធ្លាប់ជានាយកប្រតិបត្តិហានិភ័យក្នុងក្រុមហ៊ុន CIMB Group នាយកប្រតិបត្តិហានិភ័យនៅអាស៊ីប៉ាស៊ីហ្វិកសម្រាប់ធនាគារ Royal Bank of Scotland និងជានាយកប្រតិបត្តិ ប្រតិបត្តិការឥណទាននៅអាស៊ីប៉ាស៊ីហ្វិកសម្រាប់ធនាគារ Bank of America។ លោកក៏ធ្លាប់ជាសមាជិកក្រុមប្រឹក្សាភិបាលរបស់់ធនាគារ KGI Bank (តៃវ៉ាន់) និងធនាគារ PT Bank CIMB Niaga Tbk ផងដែរ។ លោកមានបទពិសោធន៍កាន់មុខតំណែងជាថ្នាក់គ្រប់គ្រងជាន់ខ្ពស់ជាច្រើនទាក់ទងទៅនឹងការគ្រប់គ្រងហានិភ័យ នៅតាមបណ្តាប្រទេសផ្សេងៗដូចជា៖ ប្រទេសសិង្ហបុរី ហុងកុង ថៃ តៃវ៉ាន់ និងម៉ាឡេស៊ី។ លោក ថូម៉ាស ធ្លាប់ទទួលបានពានរង្វាន់ជាមន្រ្តីគ្រប់គ្រងហានិភ័យធនាគារនៅអាស៊ីឆ្នើមប្រចាំឆ្នាំ 2018។

ប្រធានផ្នែក

លោក សៀង សេរី

នាយកប្រតិបត្តិ រដ្ឋបាល

លោក សៀង សេរី មានបទពិសោធន៍ជាង ២៥ ឆ្នាំជាមួយស្ថាប័នហិរញ្ញវត្ថុជាច្រើន និងក្រុមហ៊ុន FMCG អន្តរជាតិ។ មុនពេលលោកត្រលប់មកបម្រើការងារនៅ ធនាគារ ស្ថាបនា ភីអិលស៊ី ជានាយកប្រតិបត្តិ រដ្ឋបាល នៅខែមករា ឆ្នាំ២០២៣ លោកត្រូវបានតែងតាំងជាប្រធាននាយកប្រតិបត្តិនៃ ស្ថាបនា លីមីតធីត ក្នុងប្រទេសភូមា។ បន្ថែមពីលើនេះទៅទៀត លោកបានធ្លាប់បម្រើការងារនៅធនាគារជប៉ុន MARUHAN ក្នុងឆ្នាំ២០០៨ ជាប្រធានសាខា និងបានអភិវឌ្ឍអាជីពការងាររបស់លោកក្នុងតួនាទីផ្សេងៗជាច្រើនទៀតរួមមាន៖ ប្រធានសាខាស្នាក់ការកណ្តាល ប្រធានផ្នែកលក់ ប្រធានស្ថាប័នហិរញ្ញវត្ថុ នាយកប្រតិបត្តិរដ្ឋបាល និងប្រធាននាយកប្រតិបត្តិ។

លោក សេរី បានបញ្ចប់បរិញ្ញាបត្រផ្នែកគ្រប់គ្រងពីសាកលវិទ្យាល័យ MAHARISHI Vedic ក្នុងឆ្នាំ១៩៩៧ និងអនុបណ្ឌិតផ្នែកគ្រប់គ្រងពាណិជ្ជកម្មក្នុងឆ្នាំ២០០៨ ពីសាកលវិទ្យាល័យ Charles Sturt ប្រទេសអូស្ត្រាលី។ ក្នុងដំណើរអាជីពការងាររបស់លោក លោកបានចូលរួមវគ្គបណ្តុះបណ្តាលជាតិ និងអន្តរជាតិជាច្រើនដែលទាក់ទងទៅនឹងធនាគារធុរកិច្ច។ លើសពីនេះទៅទៀត លោកត្រូវបានទទួលស្គាល់ជាសមាជិកក្រុមប្រឹក្សាភិបាលដែលមានវិជ្ជាជីវៈពីវិទ្យាស្ថាន Myanmar Institute of Directors (MIoD) ក្នុងឆ្នាំ២០២០។

លោក ម៉េង វាសនា

នាយកប្រតិបត្តិហានិភ័យ

លោក ម៉េង វាសនា មានបទពិសោធន៍ជាង ១៦ ឆ្នាំ នៅក្នុងវិស័យធនាគារ និងក្រុមហ៊ុនសវនកម្មអន្តរជាតិមួយ។ លោកធ្លាប់ជាប្រធានផ្នែកសវនកម្មនៅក្រុមហ៊ុន Pricewaterhouse Coopers ក្នុងប្រទេសកម្ពុជា មុននឹងលោកបានចូលបម្រើការនៅ ម៉ារូហាន់ ធនាគារ ជប៉ុន នៅខែមេសា ឆ្នាំ២០១២ ក្នុងតំណែងជានាយកសវនកម្មផ្ទៃក្នុង និងបន្ទាប់មកកាន់តំណែងផ្សេងទៀតដូចជា ប្រធាននាយកដ្ឋានគ្រប់គ្រងហានិភ័យសាជីវកម្ម និងប្រធាននាយកដ្ឋានឥណទាន មុនពេលការរួមបញ្ចូលគ្នារវាង ម៉ារូហាន់ ធនាគារ ជប៉ុន និង ស្ថាបនា លីមីតធីត ក្លាយទៅជាធនាគារពាណិជ្ជ កាលពីខែមេសា ឆ្នាំ២០១៦។ លោកក៏បានបន្តបម្រើការជាប្រធាននាយកដ្ឋានឥណទានអាជីវកម្ម រហូតដល់លោកត្រូវបានតែងតាំងជានាយកប្រតិបត្តិហានិភ័យ នៅខែមេសា ឆ្នាំ ២០២០។ លោក វាសនា ទទួលបរិញ្ញាបត្រផ្នែករដ្ឋបាលពាណិជ្ជកម្មពីសាកលវិទ្យាជាតិគ្រប់គ្រងក្នុងឆ្នាំ ២០០២។ លោកបានប្រលងជាប់ និងក្លាយទៅជាសមាជិក ACCA ក្នុងឆ្នាំ ២០០៩ និង FCCA ក្នុងឆ្នាំ ២០១៤។ នៅក្នុងខែកញ្ញា ឆ្នាំ ២០១៩ លោកទទួលបាន “Certified Expert in Risk Management” ដោយសញ្ញាបត្រចេញពី Frankfurt School of Finance and Management ប្រទេសអាឡឺម៉ង់។

លោក ហុង ឡងឌី

នាយកប្រតិបត្តិសវនកម្មផ្ទៃក្នុង

លោក ហុង ឡងឌី មានបទពិសោធន៍ធ្វើការជាច្រើនឆ្នាំ នៅក្នុងវិស័យធនាគារ និងនៅក្រុមហ៊ុនគណនេយ្យធំមួយនៅប្រទេសកម្ពុជា។ មុនពេលចូលបម្រើការនៅ ធនាគារ ស្ថាបនា លោកគឺជាសវនករនៅ PricewaterhouseCoopers ក្នុងប្រទេសកម្ពុជាផ្នែក Assurance and Advisory។ លោកបានបម្រើសេវាដល់អតិថិជនជាច្រើន ជាពិសេសផ្នែកឧស្សាហកម្មទូរគមនាគមន៍ និងធនាគារ។ នៅឆ្នាំ ២០១៣ លោក ឡងឌី ចូលបម្រើការនៅម៉ារ៉ូហាន់ ធនាគារ ជប៉ុន ជាប្រធានសវនកម្មផ្ទៃក្នុងរហូតដល់ការរួមបញ្ចូលគ្នានៅឆ្នាំ ២០១៦ ជាធនាគារ ស្ថាបនា។ តាំងពីឆ្នាំ ២០១៦ លោកបានដឹកនាំកិច្ចការងារផ្សេងៗរួមមាន ផ្នែកគ្រប់គ្រងហានិភ័យ និងការអនុលោមប្រតិបត្តិការ ផ្នែកហានិភ័យទីផ្សារ ព្រមទាំងផ្នែកសវនកម្មផ្ទៃក្នុង។ លោក ឡងឌី ទទួលបានបរិញ្ញាបត្ររដ្ឋបាលពាណិជ្ជកម្ម ពីវិទ្យាស្ថានបច្ចេកវិទ្យា និងគ្រប់គ្រង ព្រមទាំងវិញ្ញាបនបត្រ CAT និងACCA ពីសមាគមអ្នកជំនាញគណនេយ្យACCA និងវិញ្ញាបនបត្រអ្នកជំនាញផ្នែកគ្រប់គ្រងហានិភ័យពីសាលាហិរញ្ញវត្ថុ និងគ្រប់គ្រង Frankfurt នៅប្រទេសអាល្លឺម៉ង់។ លោកធ្លាប់ជាសមាជិកថ្នាក់ FCCA នៃស្ថាប័នACCA ព្រមទាំងបច្ចុប្បន្នជាសមាជិកនៃ IIAP និង KICPAA ផងដែរ។

លោក ណក់ ពេជ្រកោសា

នាយកប្រតិបត្តិបច្ចេកវិទ្យាព័ត៌មាន

លោក ណក់ ពេជ្រកោសា មានបទពិសោធន៍បច្ចេកវិទ្យាជាង ១៩ ឆ្នាំជាមួយក្រុមហ៊ុនអន្តរជាតិ និងវិទ្យាស្ថានហិរញ្ញវត្ថុ។ មុននឹងចូលបម្រើការនៅធនាគារ ស្ថាបនា គាត់ជាប្រធានផ្នែកព័ត៌មានវិទ្យានៅធនាគារ J Trust រ៉ូយ៉ាល់។ លោកបានធ្វើការនៅធនាគារ ANZ និងធនាគារ J Trust រ៉ូយ៉ាល់អស់រយៈពេល ៨ ឆ្នាំ។ លោក កោសា ទទួលបានអនុបណ្ឌិតផ្នែករដ្ឋបាលពាណិជ្ជកម្មពីសាលកវិទ្យាល័យន័រតុន និងបរិញ្ញាបត្រផ្នែកព័ត៌មានសេដ្ឋកិច្ចពីសាកលវិទ្យាល័យភូមិន្ទនីតិសាស្ត្រ។ លោកក៏ទទួលបានវិញ្ញាបនបត្រអន្តរជាតិនៅ ITIL COBIT CPISI អ្នកដឹកនាំការអនុវត្ត ISMS ISO 27001:2013 និងតម្រូវការ QMS ISO9001:2015។

លោក កុយ ចំរើនវិជ្ជា

នាយកប្រតិបត្តិ ប្រតិបត្តិការឥណទាន

លោក កុយ ចំរើនវិជ្ជា មានបទពិសោធន៍បម្រើការងារក្នុងវិស័យធនាគាររយៈពេលជាង ១៥ឆ្នាំ ហើយមុនពេលចូលបម្រើការងារនៅធនាគារ ស្ថាបនា លោកបានបម្រើការងារនៅ ធនាគារ វឌ្ឍនៈ អស់រយៈពេលជាង ៨ឆ្នាំ។ លោកបានចូលបម្រើការងារជាមួយ ធនាគារ ស្ថាបនា ជាអនុប្រធាន នាយកដ្ឋានឥណទានក្នុងខែកញ្ញា ឆ្នាំ ២០១៥ ក្រោយមកលោកត្រូវបានតែងតាំងជា នាយកដ្ឋានប្រតិបត្តិការឥណទាននៅខែមេសា ឆ្នាំ ២០១៨ ដោយបានគ្រប់គ្រងផ្នែកជាច្រើន ដូចជាផ្នែកការវិភាគ និងវាយតម្លៃឥណទានខ្នាតតូច និងមធ្យម និងឥណទានពាណិជ្ជកម្ម ផ្នែករដ្ឋបាលឥណទាន និងផ្នែកវាយតម្លៃទ្រព្យបញ្ចាំ។ អស់ជាច្រើនឆ្នាំកន្លងមកនេះ លោកបានដឹកនាំផ្នែកឥណទាន និងសម្រេចបាននូវលទ្ធផលដ៏គាប់ប្រសើរជាច្រើនផងដែរ។ លោកបានដឹកនាំក្រុមការងារគ្រប់គ្រងគម្រោងបានដោយជោគជ័យក្នុងការបង្កើត និងកំណត់ស្តង់ដារនៃផលិតផលឥណទាន និងមាត្រដ្ឋាននៅក្នុងប្រព័ន្ធធនាគារស្នូល និងអភិវឌ្ឍនីតិវិធីប្រតិបត្តិការស្តង់ដារ គោលនយោបាយ កំណែទម្រង់ប្រតិបត្តិការ និងធ្វើអោយមានស្វ័យប្រវត្តិកម្ម។ លោកក៏បានដឹកនាំក្រុមការងារ រដ្ឋបាលឥណទាន ដើម្បីកែលម្អគុណភាពទិន្នន័យនៅក្នុងប្រព័ន្ធធនាគារស្នូល ដែលបានធ្វើឱ្យធនាគារ ស្ថាបនា បានទទួលពានរង្វាន់គុណភាពទិន្នន័យពីក្រុមហ៊ុន ក្រេឌីត ប្យួរ៉ូ (ខេមបូឌា) ខូ អិលធីឌី (ស៊ីប៊ីស៊ី) ក្នុងខែតុលា ឆ្នាំ២០១៧។ បច្ចុប្បន្ន លោកត្រូវបានតែងតាំងជានាយកប្រតិបត្តិ ប្រតិបត្តិការឥណទាននៃធនាគារ ស្ថាបនា ក្នុងខែឧសភា ឆ្នាំ២០២២។ លោក វិជ្ជា បានបញ្ចប់ថ្នាក់បរិញ្ញាបត្រជាន់ខ្ពស់ផ្នែកគ្រប់គ្រងពាណិជ្ជកម្មជំនាញគ្រប់គ្រងនៅសាកលវិទ្យាល័យន័រតុនក្នុងប្រទេសកម្ពុជាក្នុង ឆ្នាំ២០១០ និងទទួលបានបរិញ្ញាបត្រផ្នែកគ្រប់គ្រងក្នុង ឆ្នាំ២០០៧។

អ្នកស្រី ឈឹម សំអុល

នាយិកាប្រតិបត្តិ ធនធានមនុស្ស និងនីតិកម្ម

អ្នកស្រី ឈឹម សំអុល គឺជាសមាជិកដ៏សំខាន់មួយរូបនៃគណៈគ្រប់គ្រងជាន់ខ្ពស់ ធនាគារ ស្ថាបនា ដែលនាពេលបច្ចុប្បន្ននេះ អ្នកស្រីមានតួនាទីជានាយិកាប្រតិបត្តិ ធនធានមនុស្ស និងនីតិកម្ម ដោយគ្រប់គ្រងនាយកដ្ឋានចំនួន ០២ រួមមាន៖ នាយកដ្ឋានធនធានមនុស្ស និងនាយកដ្ឋាននីតិកម្ម/លេខាធិការដ្ឋាន។ សូមបញ្ជាក់ផងដែរថា អ្នកស្រី សំអុល ក៏ជាមេធាវី ដែលជាសមាជិកនៃគណៈមេធាវីនៃព្រះរាជាណាចក្រកម្ពុជា។ ជាមួយនឹងបទពិសោធន៍ក្នុងរយៈពេលជាង ១០ឆ្នាំ ក្នុងការផ្តល់ប្រឹក្សាយោបល់ផ្នែកច្បាប់ប្រកប ដោយគុណភាព ក៏ដូចជាការទទួលបានទំនុកចិត្តខ្ពស់ពីសំណាក់អតិថិជនទាំងក្នុងស្រុក និងក្រៅស្រុក ដោយរួមមានទាំងការផ្តល់ប្រឹក្សាផ្នែកពាណិជ្ជកម្ម/រដ្ឋប្បវេណី និងព្រហ្មទណ្ឌ ដែលលើសពីនេះ អ្នកស្រី ក៏ជាមេធាវីមួយរូបដែលទទួលស្គាល់ពីនិយ័តករមូលបត្រកម្ពុជា ក្នុងការប្រឹក្សាយោបល់ផ្នែកច្បាប់ក្នុងវិស័យមូលបត្រកម្ពុជាផងដែរ។

ចំពោះប្រវត្តិការសិក្សា អ្នកស្រី សំអុល គឺជាបេក្ខបណ្ឌិតដែលកំពុងសិក្សានៅរាជបណ្ឌិត្យសភាកម្ពុជា និងទទួលបានបរិញ្ញាបត្រជាន់ខ្ពស់ផ្នែកនីតិភូមិបាលពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្រ្តសេដ្ឋកិច្ច និងសាកលវិទ្យាល័យ Lumière Lyon 3។ អ្នកស្រី ក៏ជាអតីតនិស្សិតដែលទទួលបាន “អាហារូបករណ៍រាជរដ្ឋាភិបាលកម្ពុជា”ក្នុងកំឡុងឆ្នាំ២០០៤-២០០៨ សម្រាប់បរិញ្ញាបត្រផ្នែកច្បាប់ពីសាកលវិទ្យា ល័យភូមិន្ទនីតិសាស្ត្រ និងវិទ្យាសាស្រ្តសេដ្ឋកិច្ច និងសាកលវិទ្យាល័យ Lumière Lyon 2។ លើសពីនេះ អ្នកស្រី ក៏ទទួលបានបរិញ្ញាបត្រផ្នែកបង្រៀនភាសាអង់គ្លេសជាភាសាបរទេស (TEFL) ពីវិទ្យាស្ថានភាសាបរទេស (IFL) នៃសាកលវិទ្យាល័យភូមិន្ទភ្នំពេញ។

បន្ថែមពីប្រវត្តិសិក្សាខាងលើ អ្នកស្រី សំអុល ទើបតែទទួលបានគុណវុឌ្ឍិពី CEDR Mediator នៃចក្រភពអង់គ្លេសនៅដើមឆ្នាំ២០២២ ហើយអ្នកស្រីក៏ជាសមាជិករបស់ SIArb (Singapore Institute of Arbitration) តាំងពីឆ្នាំ២០១៧ ក៏ដូចជាអតីតនិស្សិតស្រាវជ្រាវនៅសាកលវិទ្យាល័យ National University of Singapore ក្នុងឆ្នាំ២០១០។

លោក ប៊ុន សារ៉ាឌី

នាយកប្រតិបត្តិផលិតផល

បច្ចុប្បន្ននេះ លោក ប៊ុន សារ៉ាឌី គឺជានាយកប្រតិបត្តិផលិតផល នៃធនាគារ ស្ថាបនា ដែលមានតួនាទីដឹកនាំ និងគ្រប់គ្រងលើផលប័ត្រ ការអនុវត្តផលិតផល និងសេវា ស្ថាបនា ព្រីមារណ៍។ លោក សារ៉ាឌី មានបទពិសោធន៍ជាង ១៨ឆ្នាំ ក្នុងវិស័យធនាគារ និង៥ឆ្នាំជាមួយក្រុមហ៊ុនសវនកម្មអន្តរជាតិ PricewaterhouseCoopers (PwC) Cambodia ដែលមានតួនាទីជាសវនករខាងក្រៅ។

នៅធនាគារ ស្ថាបនា លោកបានកាន់តួនាទីជាច្រើនរួមមាន៖ នាយកផ្នែកប្រតិបត្តិការ នាយកគ្រប់គ្រងសាខា នាយករងប្រតិបត្តិសេវាធនាគាររូបវន្តបុគ្គល និងនាយកប្រតិបត្តិផលិតផល។

មុនលោកចូលបម្រើការងារនៅធនាគារ ស្ថាបនា លោក សារ៉ាឌី ធ្លាប់កាន់តំណែងជានាយកផ្នែកគ្រប់គ្រងហានិភ័យ និងប្រតិបត្តិតាមនៅធនាគារ វឌ្ឍនៈ និងជាសវនករជាន់ខ្ពស់នៅធនាគារ កាណាឌីយ៉ា។

បន្ទាប់ពីលោកបានបញ្ចប់ការសិក្សានៅសកលវិទ្យាល័យជាតិគ្រប់គ្រងក្នុងឆ្នាំ ២០០១ លោកបានចាប់ផ្តើមអាជីពការងារ ដែលមានតួនាទីជាសវនករជាន់ខ្ពស់នៅក្រុមហ៊ុន PWC ជាកន្លែងការងារ ដែលលោកទទួលបានបទពិសោធន៍ការងារដ៏មានតម្លៃក្នុងការអនុវត្តសវនកម្ម និងវិភាគហិរញ្ញវត្ថុ។ ជាមួយនឹងតួនាទី និងបទពិសោធន៍យ៉ាងទូលំទូលាយក្នុងវិស័យធនាគារ លោក ប៊ុន សារ៉ាឌី នៅតែបន្តរួមចំណែកយ៉ាងសំខាន់ក្នុងការកសាងភាពរីកចម្រើន និងភាពជោគជ័យដល់ធនាគារ ស្ថាបនា។

លោក ឆេង យ៉ានិត

នាយកប្រតិបត្តិលក់ និងចែកចាយ

លោក យ៉ានិត ត្រូវបានតែងតាំងជានាយកប្រតិបត្តិលក់ និងចែកចាយក្នុងខែតុលា ឆ្នាំ២០២៤។ លោកបានបម្រើការងារជានាយករងប្រតិបត្តិសេវាធនាគាររូបវន្តបុគ្គល នៃធនាគារ ស្ថាបនា ក្នុងខែមិថុនា ឆ្នាំ២០២៤។

លោក យ៉ានិត មានបទពិសោធន៍ជាង ២០ឆ្នាំ ក្នុងវិស័យមីក្រូហិរញ្ញវត្ថុ និងធនាគារ ជាមួយនឹងកំណត់ត្រាការងារដ៏ឆ្នើមក្នុងផ្នែកផ្សេងៗគ្រប់ស្ថានភាពរាប់បញ្ចូលទាំងកំណត់ត្រាការងារទាំងក្នុងស្រុក និងក្រៅស្រុក។

លោក យ៉ានិត មានបទពិសោធន៍ និងចំណេះដឹងយ៉ាងស្ទាត់ជំនាញលើការលក់ ឌីជីថល ការគ្រប់គ្រងគម្រោង ការអភិវឌ្ឍន៍ផលិតផលឥណទាន ការគ្រប់គ្រងហានិភ័យ ការគ្រប់គ្រងផ្ទៃក្នុង ការបង្វឹក និងការបណ្តុះបណ្តាលភាពជាអ្នកដឹកនាំ។ បន្ថែមពីលើនេះ លោកក៏មានបទពិសោធន៍ និងជំនាញយ៉ាងពិសេសក្នុងការចាប់ផ្តើមអាជីវកម្ម ការអភិវឌ្ឍអាជីវកម្មឱ្យមានភាពរីកចម្រើន និង ការគ្រប់គ្រងវិបត្តិដូចដែលលោកបានបង្ហាញឱ្យឃើញពីភាពជោគជ័យទាំងនោះនៅពេលដែលលោកបានបម្រើការងារជានាយកប្រតិបត្តិប្រតិបត្តិការនៅប្រទេសមីយ៉ាន់ម៉ា។

លោកយ៉ានិត ទទួលសញ្ញាប័ត្រអនុបណ្ឌិតផ្នែកហិរញ្ញវត្ថុ និងធនាគារពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រសេដ្ឋកិច្ច (RULE) និងវិញ្ញាបនបត្រគ្រប់គ្រងគម្រោងពីស្ថាប័នគ្រប់គ្រងសិង្ហបុរី។

របាយការណ៍ប្រចាំឆ្នាំ ២០២៣

របាយការណ៍ប្រចាំឆ្នាំ ២០២២

របាយការណ៍ប្រចាំឆ្នាំ ២០២១

របាយការណ៍ប្រចាំឆ្នាំ ២០២០

របាយការណ៍ប្រចាំឆ្នាំ ២០១៩

របាយការណ៍ប្រចាំឆ្នាំ ២០១៨

របាយការណ៍ប្រចាំឆ្នាំ ២០១៧

របាយការណ៍ប្រចាំឆ្នាំ ២០១៦

របាយការណ៍ប្រចាំឆ្នាំ ២០១៥

របាយការណ៍ប្រចាំឆ្នាំ ២០១៤

MARUHAN Japan Bank Annual Report 2014

របាយការណ៍សវនកម្មហិរញ្ញវត្ថុ

របាយការណ៍សវនកម្មហិរញ្ញវត្ថុ (មុនការរួមបញ្ចូលគ្នា)

ការអនុវត្តការងារទំនួលខុសត្រូវសង្គមរបស់ ធនាគារ ស្ថាបនា ពាក់ព័ន្ធនឹងការធ្វើសកម្មភាព និងគម្រោងដែលផ្តល់នូវផលប្រយោជន៍ និងជះឥទ្ធិពលជាវិជ្ជមានដល់សហគមន៍ បរិស្ថាន និងសង្គមទាំងមូល។

ចំនុចសំខាន់នៃការងារទំនួលខុសត្រូវសង្គមរបស់យើង គឺផ្តោតលើការអភិវឌ្ឍន៍សហគមន៍ដែលពាក់ព័ន្ធនឹងការគាំទ្រដល់អង្គការក្នុងស្រុក និងគាំទ្រនូវគំនិតផ្តួចផ្តើមដែលកំពុងធ្វើលើកកម្ពស់ដល់ការអភិវឌ្ឍសេដ្ឋកិច្ចនៅក្នុងសហគមន៍ដូចជា៖ ការជួយគាំទ្រដល់អាជីវកម្មខ្នាតតូច និងជួយលើកកម្ពស់ជីវភាពរស់នៅរបស់ប្រជាជនកម្ពុជា។

និរន្តរភាព គឺជាផ្នែកសំខាន់មួយទៀតនៃការងារទំនួលខុសត្រូវសង្គមរបស់យើងដូចជា ការជំរុញលើការធ្វើប្រតិបត្តិការអាជីវកម្មប្រកបដោយនិរន្តរភាពដែលផ្តោតលើការកាត់បន្ថយការប្រើប្រាស់ថាមពល និងកាកសំណល់ និងការគាំទ្រដល់ការអភិរក្សផ្សេងៗក្នុងតំបន់មួយចំនួន។

យើងជឿជាក់ថាតាមរយៈការចូលរួមរបស់យើង គឺជាការរួមចំណែកមួយក្នុងនាមជាធនាគារពាណិជ្ជក្នុងការលើកកម្ពស់សុខុមាលភាពរបស់សហគមន៍ និងបង្កើតនូវពលជាវិជ្ជមានជុំវិញខ្លួនយើងផងដែរ។

PCI Data Security Standard Certificate 2024

PCI PIN Security Standard Certificate 2024

PCI Data Security Standard Certificate 2022

PCI Data Security Standard Certificate 2023

PCI PIN Security Standard Certificate 2022

គោលនយោបាយឯកជនភាពរបស់ ធនាគារ ស្ថាបនា ភីអិលស៊ី

គោលការណ៍ឯកជនភាពរបស់ធនាគារ ស្ថាបនា (ហៅកាត់ថា “គោលការណ៍ឯកជន”) មានគោលបំណងផ្តល់នូវព័ត៌មានទាក់ទងនឹងការប្រមូល ការបង្ហាញ ការប្រើប្រាស់ និងការចែករំលែក (ហៅជារួមថា “ដំណើរការ” )_ព័ត៌មានបុគ្គលដោយធនាគារ ស្ថាបនា និងបុត្រសម្ព័ន្ធរបស់ខ្លួន (តទៅនេះហៅថា “ធនាគារស្ថាបនា” “យើង” ឬ “យើងខ្ញុំ”) តាមរយៈការប្រើប្រាស់របស់លោកអ្នកនៅលើគេហទំព័ររបស់ធនាគារ ស្ថាបនា កម្មវិធីទូរសព្ទដៃ (Mobile Applications) និងទំព័របណ្ដាញសង្គម ដែលភ្ជាប់ទៅនឹងគោលការណ៍ឯកជនដោយអនុលោមតាមច្បាប់ជាធរមាន។ គោលការណ៍ឯកជននេះ ក៏ពន្យល់ផងដែរអំពីសិទ្ធិឯកជនរបស់លោកអ្នកទាក់ទងនឹងការដំណើរការព័ត៌មាននេះ។

ដូចដែលមានចែងក្នុងគោលការណ៍ឯកជននេះ ព័ត៌មាននិងទិន្នន័យផ្ទាល់ខ្លួន មានន័យថាព័ត៌មាន ទោះបីជាពិត ឬមិនពិតក៏ដោយ ដែលទាក់ទងនឹងការកំណត់អត្តសញ្ញាណឯកត្តបុគ្គល និងនីតិបុគ្គល។ សម្រាប់ព័ត៌មានជាអប្បរមាត្រូវរួមបញ្ចូលដោយមិនកំណត់តែទៅលើ ឈ្មោះក្រុមហ៊ុន និងឯកសារក្រុមហ៊ុន ឬ ឈ្មោះ អាសយដ្ឋាន ភេទ ថ្ងៃខែឆ្នាំកំណើត អត្តសញ្ញាណប័ណ្ណ សៀវភៅគ្រួសារ លិខិតឆ្លងដែន អ៊ីម៉ែល មុខរបរ ព័ត៌មានលំអិតទាក់ទងនឹងអាជីវកម្ម លេខទូរស័ព្ទ ឬ ព័ត៌មានដែលប្រមូលបានតាមរយៈការទំនាក់ទំនងជាមួយពួកយើងនៅលើគេហទំព័រ ឬ ព្រឹត្តិការណ៍ផ្សេងៗ។ ព័ត៌មាននិងទិន្នន័យផ្ទាល់ខ្លួន សំដៅលើ (“ព័ត៌មានអំពីលោកអ្នក”)។

យើងស្នើលោកអ្នកអានគោលការណ៍ឯកជននេះដោយប្រុងប្រយ័ត្ន ដើម្បីដឹងច្បាស់អំពីដំណើរការនៃការអនុវត្តទិន្នន័យរបស់យើង មុនពេលចុះឈ្មោះ និង/ឬ ប្រើប្រាស់ផលិតផល និងសេវាកម្មរបស់ធនាគារស្ថាបនា។ ប្រសិនបើលោកអ្នកមានកង្វល់ទាក់ទងនឹងការប្រើប្រាស់នូវព័ត៌មាន និងទិន្នន័យផ្ទាល់ខ្លួន លោកអ្នកអាចពិចារណាមិនប្រើប្រាស់គេហទំព័រនេះបាន។

តាមរយៈការប្រើប្រាស់គេហទំព័ររបស់យើង មានន័យថាលោកអ្នកបានផ្តល់នូវការយល់ព្រមជាលាយលក្ខណ៍អក្សរដល់យើង ដើម្បីរក្សាទុកព័ត៌មាន និងទិន្នន័យផ្ទាល់ខ្លួនរបស់លោកអ្នក។ ទោះជាយ៉ាងណាក៏ដោយ ព័ត៌មានរបស់លោកអ្នកនឹងមិនត្រូវបានចែករំលែក ឬលក់ទៅឱ្យភាគីទីបីណាមួយឡើយ លុះត្រាតែមានការទាមទារពីច្បាប់ ឬបទបញ្ញត្តិណាមួយ។ គោលការណ៍ឯកជននេះ អាចមានការផ្លាស់ប្តូរនៅពេលណាមួយ ឧទាហរណ៍ដូចជាការប្រតិបត្តិតាមច្បាប់ ឬស្របតាមតម្រូវការនៃការផ្លាស់ប្ដូរអាជីវកម្ម។

ព័ត៌មាននិងទិន្នន័យផ្ទាល់ខ្លួនដែលប្រមូលបានទាំងអស់ អាចស្វែងរកបាននៅលើគេហទំព័ររបស់យើង ហើយវាអាចត្រូវបានស៊ើបអង្កេត និងត្រួតពិនិត្យដោយធនាគារស្ថាបនា ឬដៃគូពាណិជ្ជកម្មរបស់យើង ឬភាគីទីបី។ ទោះបីជាយ៉ាងណា ធនាគារស្ថាបនា ឬដៃគូពាណិជ្ជកម្មរបស់យើង ឬភាគីទីបី មិនអះអាង ឬធានានូវភាពត្រឹមត្រូវ ភាពគ្រប់គ្រាន់ ភាពពេញលេញ និងបច្ចុប្បន្នភាពនៃព័ត៌មានដែលទទួលបាននោះឡើយ។

រាល់ព័ត៌មាននិងទិន្នន័យផ្ទាល់ខ្លួនទាំងអស់ដែលប្រមូលនៅលើគេហទំព័ររបស់យើង ឬតាមរយៈទំនាក់ទំនងរបស់លោកអ្នកដែលមានជាមួយយើង ដូចបានចែងខាងលើ នឹងត្រូវបានប្រើប្រាស់សម្រាប់គោលបំណងដូចខាងក្រោម៖

ការផ្ដល់ជូនសេវាកម្ម និងផលិតផលរបស់ធនាគារ ស្ថាបនា រួមទាំងគេហទំព័ររបស់ខ្លួន។
ចុះឈ្មោះដើម្បីទទួលបានផលិតផល និងសេវាកម្មរបស់ធនាគារ ស្ថាបនា។
ការជ្រើសរើសបុគ្គលិក និងគ្រឹះស្ថានសិក្សារបស់ស្ថាបនា។
ឆ្លើយតបទៅនឹងសំនួរ និងការបញ្ចេញមតិកែលម្អ ក្នុងករណីដែលលោកអ្នកមានសំណើ និងកង្វល់ជាក់លាក់ណាមួយ។
ស្រាវជ្រាវទីផ្សារ និងផ្សព្វផ្សាយពាណិជ្ជកម្ម។
ការវាយតម្លៃពាណិជ្ជកម្ម ការទំនាក់ទំនង ព្រឹត្តិបត្រព័ត៌មាន និងការទំនាក់ទំនងអតិថិជនផ្សេងទៀត ដូចជាការស្ទង់មតិជាដើម។
ការគ្រប់គ្រងកិច្ចសន្យា និងទំនាក់ទំនងជាមួយក្រុមហ៊ុន ផ្គត់ផ្គង់ និងអតិថិជនរបស់យើង។
ប្រតិបត្តិការនៃគេហទំព័ររបស់យើង (អាសយដ្ឋាន IP, Cookies, ការបង្កើនល្បឿនគេហទំព័រ សុវត្ថិភាពទិន្នន័យ ទិន្នន័យអនាមិកសម្រាប់រាយការណ៍ និងស្ថិតិ និងសម្រាប់រក្សាទុកជូនអតិថិជន)។
កែលម្អ និងរក្សាដំណើរការរបស់គេហទំព័រ និងហេដ្ឋារចនាសម្ព័ន្ធរបស់យើង។
វិភាគ អភិវឌ្ឍ កែលម្អ និងបង្កើនប្រសិទ្ធភាពនៃការប្រើប្រាស់ មុខងារ និងដំណើរការរបស់គេហទំព័រ និងសេវាកម្ម និងផលិតផលរបស់យើង។
អនុលោមតាមកាតព្វកិច្ចអនុលោមភាព ច្បាប់ និងបទប្បញ្ញត្តិជាធរមាន ឬផ្ដល់ជំនួយដល់ការអនុវត្តច្បាប់ និងការស៊ើបអង្កេតរបស់អាជ្ញាធរមានសមត្ថកិច្ច និង/ឬស្របតាម តម្រូវការអាជីវកម្មរបស់យើង។

លោកអ្នកមានសិទ្ធិស្នើសុំយើងខ្ញុំដើម្បីចូលប្រើប្រាស់ កែតម្រូវ រឹតបន្តឹង ទទួលច្បាប់ថតចម្លង និងស្នើសុំលុបព័ត៌មាននិងទិន្នន័យផ្ទាល់ខ្លួនរបស់លោកអ្នកតាមច្បាប់ និងបទបញ្ញត្តិជាធរមាន។ ដូចគ្នាផងដែរ លោកអ្នកក៏អាចស្នើសុំធ្វើបច្ចុប្បន្នភាពព័ត៌មានឯកជនរបស់លោកអ្នកបានគ្រប់ពេលវេលា ប្រសិនបើវាមិនត្រឹមត្រូវ ឬមិនពេញលេញ។ នៅក្នុងស្ថានភាពមួយចំនួន លោកអ្នកមានសិទ្ធិស្នើសុំឲ្យយើងលុប ឬរឹតបន្តឹងព័ត៌មានរបស់លោកអ្នក ប៉ុន្តែយើងមានសិទ្ធិក្នុងការបន្តរក្សាទុក ឬបន្តដំណើរការព័ត៌មានរបស់លោកអ្នក ឬបដិសេធការស្នើសុំរបស់អ្នក។

ប្រសិនបើលោកអ្នកមានចម្ងល់ ឬការតវ៉ាទាក់ទងនឹងគោលការណ៍ឯកជននេះ សូមទាក់ទងមកយើងខ្ញុំតាមរយៈផ្នែកបម្រើអតិថិជន (+៨៥៥ (០) ២៣/៨១ ៩៩៩០១០ និងតាមរយៈអ៊ីម៉ែល customercare@sathapana.com.kh ឬតាមរយៈសាខាដែលនៅជិតលោកអ្នកបំផុត។ យើងនឹងធ្វើការស៊ើបអង្កេត និងព្យាយាមដោះស្រាយរាល់បញ្ហា និង/ឬ ការតវ៉ាទាក់ទងទៅនឹងការប្រើប្រាស់ និងការបង្ហាញនូវព័ត៌មាន និងទិន្នន័យផ្ទាល់ខ្លួនរបស់លោកអ្នក ដោយអនុលោមតាមគោលការណ៍ឯកជននេះ និងច្បាប់ជាធរមាន។

យើងប្តេជ្ញាការពារនូវព័ត៌មាន និងទិន្នន័យផ្ទាល់ខ្លួនរបស់លោកអ្នក ប្រឆាំងនឹងការបំផ្លិចបំផ្លាញដោយចៃដន្យ ឬដោយខុសច្បាប់ ការបាត់បង់ដោយចៃដន្យ ការរិចរឹល និងការលាតត្រដាង ឬ ការចូលប្រើប្រាស់ដោយគ្មានការអនុញ្ញាត។ យើងត្រួតពិនិត្យ និងកត់ត្រានូវការផ្លាស់ប្តូរទិន្នន័យដើម្បីរក្សានូវការសម្ងាត់ ភាពត្រឹមត្រូវ និងហេដ្ឋារចនាសម្ព័ន្ធ និងព័ត៌មានទិន្នន័យរបស់យើង។ លើសពីនេះទៀត ក្នុងករណីមានសកម្មភាពសង្ស័យ ធនាគារស្ថាបនា អាចប្រមូលទិន្នន័យ (រួមទាំងទិន្នន័យផ្ទាល់ខ្លួន) ពីប្រភពផ្សេងៗដើម្បីចាប់ផ្តើម និងគ្រប់គ្រងទៅលើការស៊ើបអង្កេតរបស់ខ្លួន។

រាល់ព័ត៌មាននិងទិន្នន័យផ្ទាល់ខ្លួនរបស់លោកអ្នកដែលប្រមូលបាន នឹងត្រូវយកមកប្រើប្រាស់ដើម្បីអនុវត្តកាតព្វកិច្ចទាក់ទងនឹងផលិតផល និងសេវាកម្មរបស់ធនាគារស្ថាបនា ហើយអាចត្រូវបានចែករំលែកផងដែរទៅកាន់ភ្នាក់ងារ អ្នកផ្តល់សេវាដែលជាភាគីទីបី និងអាជ្ញាធរពាក់ព័ន្ធ។ ធនាគារស្ថាបនា និងភាគីទីបី ឬ ភ្នាក់ងារដែលទទួលបានការអនុញ្ញាត ដែលអាចចូលទៅកាន់ព័ត៌មានរបស់អ្នក ឬ អនុវត្តការងារណាមួយក្នុងនាមយើងខ្ញុំ ត្រូវគោរពតាមស្តង់ដារប្រតិបត្តិតាមដើម្បីការពារព័ត៌មាន ដោយអនុវត្តតាមយន្តការការពារសុវត្ថិភាពឱ្យបានសមស្របសម្រាប់រាល់ទិន្នន័យទាំងអស់។

ការប្រមូលទិន្នន័យ

យើងខ្ញុំចង់ឱ្យលោកអ្នកដឹកពីប្រភេទព័ត៌មានផ្សេងៗគ្នាដែលយើងខ្ញុំនឹងប្រមូលយក ដូច្នេះលោកអ្នកអាចសម្រេចចិត្តដោយភាពឆ្លាតវ៉ៃក្នុងការជ្រើសរើសនូវព័ត៌មានណាមួយដែលត្រូវផ្ដល់ឱ្យយើងខ្ញុំ។ រាល់ព័ត៌មានដែលទាក់ទងទៅនឹងអ្វីដែលអាចកំណត់នូវអត្តសញ្ញាណបុគ្គលត្រូវបានចាត់ទុកថាជាទិន្នន័យផ្ទាល់ខ្លួន ហើយយើងខ្ញុំអាចនឹងប្រមូលទ័ន្នន័យនេះនៅពេលដែលលោកអ្នកប្រើប្រាស់សេវាកម្ម ឬផលិតផលរបស់យើងខ្ញុំ៖
១. ព័ត៌មានផ្ទាល់ខ្លួន មានដូចជាឈ្មោះ, អាសយដ្ឋាន និងថ្ងៃខែឆ្នាំកំណើត ព័ត៌មានស្ដីពីពន្ធ ការធានារ៉ាប់រង និងការងារ។
២.ព័ត៌មានស្ដីពីហិរញ្ញវត្ថុ និងធនាគាររបស់លោកអ្នកជាមួយនឹងយើងខ្ញុំ រួមទាំងរូបថត ទិន្នន័យជីវមាត្រ។
៣.ព័ត៌មានពីទូរស័ព្ទ/ឧបករណ៍ចល័តរបស់លោកអ្នកដែលទទួលបានការអនុញ្ញាតពីលោកអ្នក (មានដូចជា លេខទំនាក់ទំនង, ប្រតិទិន, ស្ថានភាពទំនាក់ទំនង, កាមេរ៉ា, ការចូលទៅកាន់កន្លែងផ្ទុកទិន្ន័យពិសេស និងព័ត៌មានស្ដីពីទីតាំង។

លោកអ្នកយល់ព្រមផ្តល់ឱ្យ ធនាគារ ស្ថាបនា នូវឆន្ទានុសិទ្ធិក្នុងការប្រមូលព័ត៌មានផ្ទាល់ខ្លួនរបស់លោកអ្នក និងអាចចែករំលែកទៅកាន់ដៃគូអាជីវកម្មរបស់ ធនាគារ ស្ថាបនា អនុលោមតាមគោលការណ៍ឯកជនភាពរបស់ ធនាគារ ស្ថាបនា។ ជាមួយនឹងការខិតខំប្រឹងប្រែងដ៏ល្អបំផុតរបស់ពួកយើងខ្ញុំ ក្នុងចរិកលក្ខណៈ និង គោលបំណងស្របច្បាប់ ធនាគារ ស្ថាបនា និងដៃគូអាជីវកម្មនឹងធានានូវព័ត៌មានដែលបានប្រមូលត្រូវប្រើប្រាស់សម្រាប់ ប៉ុន្តែមិនកំណត់ត្រឹម ការវិភាគ ការចាប់យកលេខទំនាក់ទំនង ប្រតិទិន ការចូលទៅប្រើអ៊ីនធើណេត ការមេរ៉ា ការចូលទៅប្រើមុខងារទីតាំងជាដើម ។ល។ ដើម្បីផ្ដល់នូវផលិតផល និងសេវាកម្មដ៏ល្អបំផុតមួយសម្រាប់លោកអ្នក។

គេហទំព័រនេះ ត្រូវបានបង្កើតឡើងដោយធនាគារស្ថាបនា ហើយវាត្រូវបានដាក់ឱ្យដំណើរការក្រោមឈ្មោះ www.sathapana.com.kh។ លោកអ្នកមានកាតព្វកិច្ចគោរពរាល់លក្ខខណ្ឌប្រើប្រាស់ និងគោលការណ៍ឯកជននៅក្នុងគេហទំព័រនេះ។

អំឡុងពេលប្រើប្រាស់គេហទំព័រនេះ លោកអ្នកទទួលស្គាល់និងព្រមព្រៀងថា គេហទំព័រធនាគារស្ថាបនា អាចមានតំណភ្ជាប់ទៅគេហទំព័រផ្សេងទៀតដែលដំណើរការ និងគ្រប់គ្រងដោយភាគីទីបី ហើយលោកអ្នកយល់ព្រមថានឹងទទួលខុសត្រូវទៅលើការខូចខាត ការបាត់បង់ដោយចៃដន្យ ការរិចរឹល និងការចូលប្រើដោយគ្មានការអនុញ្ញាត ដែលអាចកើតមានឡើងពីគេហទំព័រភាគីទីបីនេះ។ រាល់សំណើទាក់ទងនឹងការលក់ និងព័ត៌មានទាក់ទងនឹងទំនិញ ឬសេវាកម្មដែលមានលើគេហទំព័រភាគីទីបី គឺជាការទទួលខុសត្រូវរបស់គេហទំព័រភាគីទីបីនេះ។

កម្មសិទ្ធិបញ្ញា៖ កម្មសិទ្ធិទាំងអស់ដែលមាននៅលើគេហទំព័រនេះ គឺជាកម្មសិទ្ធិ ឬទទួលបានអាជ្ញាប័ណ្ណដោយធនាគារស្ថាបនា។ លោកអ្នកមិនមានសិទ្ធិផលិតឡើងវិញ បោះពុម្ពឡើងវិញ ចែកចាយ ឬកែសម្រួល ឬផ្លាស់ប្តូរព័ត៌មានមួយផ្នែក ឬទាំងស្រុង ទោះបីជាក្នុងទម្រង់ណាមួយក៏ដោយ។ ស័្វយភាពនៃបញ្ញត្តិ៖ ភាពមិនត្រឹមត្រូវ ភាពខុសច្បាប់ ឬភាពមិនអាចអនុវត្តបាននៃលក្ខខណ្ឌណាមួយដែលមានក្នុងគេហទំព័រនេះ នឹងមិនប៉ះពាល់ដល់លក្ខខណ្ឌផ្សេងទៀតដែលនៅមាន សុពលភាព ស្របច្បាប់ និងភាពអាចអនុវត្តបាននោះឡើយ។

Cookies៖ Cookies គឺជាចំណែកតូចនៃព័ត៌មានដែលបានរក្សាទុក និងបានចែករំលែកដោយកម្មវិធីរុករកតាមអ៊ីនធឺណែតនៅលើទូរសព្ទដៃ ឬ អង្គផ្ទុកទិន្នន័យ (Computer’s hard drive) ឬនៅក្នុងអង្គចងចាំតំណភ្ជាប់ (browser memory)។ យើងប្រើ Cookies នៅលើគេហទំព័ររបស់យើង ដើម្បីធានាបាននូវបទពិសោធន៍ល្អបំផុត និងមានសុវត្ថិភាពខ្ពស់នៅលើគេហទំព័ររបស់យើង ដើម្បី ផ្តល់ជូនលោកអ្នកនូវព័ត៌មានដែលសមស្របទាក់ទងនឹងផលិតផល និងសេវាកម្ម។

ធនាគារស្ថាបនា ប្រើ Cookies ឬកបច្ចេកវិទ្យាស្រដៀងគ្នានៅលើគេហទំព័ររបស់ខ្លួន ដើម្បីប្រមូលព័ត៌មានតាមអនឡាញ ដូចជាលេខសម្គាល់ទូរសព្ទចល័តរបស់លោកអ្នក អាសយដ្ឋាន IP និងព័ត៌មានផ្សេងទៀតពីឧបករណ៍របស់លោកអ្នក ក៏ដូចជាលក្ខណៈទិន្នន័យនៃការប្រើប្រាស់ឧបករណ៍របស់លោកអ្នកនៅលើគេហទំព័ររបស់យើង។